காதுகுத்து விழா !

 

ஆகாதப் பாதையில் 
போகின்ற நீதியில் 
வேகாத சிதையெடுத்து 
வெறிநாய்கள் பசியடக்க 
நோகாமல் படுத்திருக்கும் 
நொண்டி ஜனநாயகம் ! 

ஏகாந்த தனிமைக்குள் 
இடறுண்டு இனமொன்று 
காணாத துயரெல்லாம் 
காண்கின்ற பொழுதொன்றில் 
ஆகாத கதைப்பேசி 
அண்டிவரும் ! அருகில்வரும் ! 
அண்டைய ஜனநாயகம் ! 

தேர்தலுக்கு நாள்குறித்து 
கூத்தணிகள் கூத்தடிக்கும் ! 
தடுமாறா நாக்குகளில் 
தமிழ்பாசம் விளையாடும் ! 
தூக்குக் கயிறவிழ்த்து 
தூண்டிலிடும் வாக்கிழுக்க ! 
மாட்டிக் கொள்ளும் மீன்களுக்கு 
மட்டும்தானே முள்குத்தும் ? 

உடன்பிறந்த உறவென்று 
உணர்வொழுக அறிக்கையிடும் ! 
நீலிக் கண்ணீர் வடித்து 
போலிக் கதைகள் பேசும் ! 
உடற்கருக்கும் தீயெடுத்து 
வீட்டுக்குள் விளகேற்றும் ! 
கடன்மறந்து கதவடைத்து 
கள்ளக் குடித்தனம் நடத்தும் ! 

உயிர்பிடித்து ஓடிவந்த 
அகதிகளின் முதுகிலேறி 
சவாரிக்கும்! சம்பாரிக்கும் ! 
போராட்டம் பலநடக்கும் 
பொங்கியெழும் ஒருகூட்டம் ! 
போராளி தோழரென்று 
அறைகூவல் வான்பிளக்கும் ! 

சிலருக்கு முடி வேண்டும் 
பலருக்கு நிதி வேண்டும் 
கிடைக்கும் வரை கிளறுவார்கள் 
நீதியென்று புளுகுவார்கள் 
கஷ்டவேலி முட்கள் தைத்து 
கஷ்டப்படுவோர் கத்துவார்கள் 
தேதி வந்து தேவை தீர்ந்தால் 
கதைகூறி காது பொத்துவார்கள் ! 
அவர்கள் கரை காண்பார்கள் 
இவர்கள் கறை காண்பார்கள் ! 

தேர்தல் முடிய தேவை முடிய 
சத்தியங்கள் பத்திரமாய் 
சத்திரத்தில் சயனிக்கும் ! 
சாகா வரம்பெற்ற 
சரித்திரத்தின் தரித்திரம் 
கும்பர்கர்ண துயில்களைந்து 
காதுகுத்தும் விழா செய்ய 
மீண்டுமெழும் ஐந்தாண்டில் !